Милевски: Утре заедно да им дадеме поддршка на семејствата на настраданите

Македонија ја започна својата кампања за квалификациите за Мундијалот со триумф над Лихтенштајн, а сега се подготвува за дуел против Велс.

Селекторот Боби Милевски изрази желба да репрезентацијата повеќе никогаш да не биде принудена да игра во вакви околности, соочена со колективна тага.

„И пред дуелот со Лихтенштајн споменав дека емоциите се присутни. Подготовката за овие натпревари беше особено тешка, не само за мене, туку и за играчите. По натпреварот со Лихтенштајн изјавив дека против Велс ни претстои можеби најтешкиот меч во групата. Она што можеме да го направиме е утре сите заедно да покажеме поддршка за семејствата на настраданите“, изјави Милевски.

„Внимателно ја анализиравме играта на Велс не само во дуелот против Казахстан. Верувам дека сме спремни. Технички и тактички треба да бидеме на највисоко ниво, и тркачкиот дел треба да го изведеме совршено. Максимална фокусираност е неопходна ако сакаме да се надеваме на добар резултат. Не се чувствуваме како фаворити“, дополни селекторот.